BUTUAN CITY – Desididong mopasaka ug kaso ang incumbent mayor sa Kitcharao, Agusan Del Norte batuk sa 3 ka tawong gitu-uhang dunay dautang tuyo apan nabaraw human nasakpan sa otoridad.
Sa eksklusibong pakighinabi sa Bombo Radyo Butuan, gibutyag ni Mayor Aristotle Montante nga misimba siya pasado alas 7:00 kagabii sa Iglesia ni Kristo kauban ang uban pang mga kandidato dihang nagkagubot ang gawas nga bahin sa simbahan.
Kini tungod sa nadakpang tulo ka tawong nagpaka-aron-ingnong mosimba kinsa armado sa mubo nga klase sa armas nga gilabay matud pa sa kanal.
Gi-imbestigar mismo ni Mayor Montante ang nasangpit nga mga lalaki diin gi-angkon sa ginganlan og Marvin nga taga Tandag City, Surigao Del Norte nga mga tawo matud pa sila sa ka-atbang niini sa pagka-mayor karong piliay nga iya ra usab nga pag-umangkong si Milky Montante.
Ang mga nadakpan mga construction workers matud pa nga nagpuyo sa panimalay sa iyang ka-atbang sa pulitika.
Gipadayag na lang niini nga wala siya masuko nga mi-agbat kaniya ang iyang pag-umangkon sa mayoralty race apan nanghinaut kini nga dili lang unta ipaagi sa kagubot ang eleksyon og pasagdan na lang ang katawhan nga magdesisyon sa ilang botaran.
Dako ang pagtoo ni Mayor Montante nga siya ang tuyo sa mga niini aron patyon ilabina kay dili contractor ang iyang pag-umangkon og walay gitrabaho usab sa panimalay niini.
Una na matud pa siyang nakadawat og impormasyon mahitungod sa gi-hire sa iyang pag-umangkon nga mga tawo gikan sa Tandag City ug Bayugan City sa Agusan del Sur.
