BUTUAN CITY – Temporaryong gisuspende sa Coast Guard Station-Surigao del Norte ang biyahe sa tanang mga sakyanang pandagat gikan sa mainland sa maong lalawigan padulong na sa mga lugar nga apektado sa bagyong Wilma.
Sa gipagawas nga sea travel advisory sa maong station, gitugutan lang sa paglawig ang mga roll-on roll-off kon Ro-Ro vessels gikan sa Surigao port padulong na sa San Jose port sa Dinagat Islands ug vice versa ubos sa pipila ka mga kondisyon.
Apil niini ang pagsiguro nga wala kini karga nga mga pasahero gawas lang sa mga drivers sa rolling cargoes; wala’y karga nga delikado; duna’y gibug-atong kapin sa 300-gross tonnage; mubiyahe lang og adlawa ug kinahanglang maka-abot sa pantalan paglabay sa 30-minutos; ingon man kung kalma lang ang dagat o kaha ang dalang hangin sa bagyo anaa lang sa 25-kilometros matag-oras.
Ibalik lang ang normal nga biyahe sa kadagatan kung duna na sila’y ipagawas nga bag-ong advisory.
Alayon niini, gipadayag ni Irvin Dionaldo, residente sa Surigao City nga misunod na niini ang tanang sakyanang pandagat nga anaa sa may Boulevard rason nga daghang mga pasahero na ang stranded.
Sa kinatibuk-an, pabilin nga kontrolado ug manageable ang sitwasyon sa Surigao City diin taligsik ug hangin-hangin lamang ang nasinati isip epekto sa bagyong Wilma.
