BUTUAN CITY – Politically motivated matud pa ang gidusong reklamong plunder ug graft ni Atty Mary Helen Polinar Zafra ngadto sa Office of the Ombudsman.
Kini ang gibarugan ni Surigao del Sur 1st District Rep Romeo Momo Sr, sa eksklusibong pakighinabi sa Bombo Radyo Philippines dungan sa pagbutyag nga sukad sa pagsulod matud pa niya sa pulitika, mibiya na usab siya sa construction company nga gipanag-iyahan sa iyang pamilya, ang Surigao La Suerte Corporation.
Gipadayag sa kongresista nga ang iyang basehan nga duna’y bahid sa pulitika ang maong reklamo tungod kay napildi matud pa si Atty Zafra sa mi-aging local elections kondiin midagan kini pagka-konsehal. Samtang ang igsoon ni Zafra, napildi usab sa iyang asawa dayong butyag nga nangita lang og mga isyu si Zafra kinsa kabanay matud pa ni kanhi Congressman Prospero Pichay nga ilang ka-atbang sa pulitika sa rasong hapit na ang 2028 local and national elections.
Tungod matud pa niini nga isyu bukas siyang mu-resign isip contingent sa House of Representatives sa Bicameral Conference Committee kon BiCam ilabina kung maka-apekto siya sa integridad sa Bicam body. Andam matud pa siyang mutabang sa laing paagi kung kinahanglanon ang iyang kahibalo kalabot sa budgeting process isip kanhi undersecretary sa Department of Public Works and Highways kon DPWH.
