BUTUAN CITY – Hayag kaayong masaksihan unyang gabii diha sa kawanangan ang planetang Venus tungod sa paglinya kon conjunction sa atong buwan kon Moon ug sa maong planeta.
Sigon ni Glaiza Zambrano sa Philippine Atmospheric, Geophysical, Astronomical Services Administration kon PAGASA-Butuan, gawas sa paglinya sa buwan ug Venus, niining semanaha usab, makita ang conjunction sa mga planetang Venus, Saturn ug Jupiter.
Sa eksklusibong pakighinabi sa Bombo Radyo Butuan, gipadayag ni Zambrano nga bisan og kada-gabii makita ang planetang Venus apan karong gabii, masaksihan ang pinakahayag niining sidlak nga mu-abot sa magnitude -4.7.
Samtang sa Disyembre 8 usab kon ugmang adlawa, maklaro diha sa kawanangan ang paglinya sa Moon ug mga planetang Saturn, ug Venus. Pagka-Disyembre 9, anaa na usab ang conjunction tali sa Moon ug mga planetang Jupiter, Saturn ug Venus kansa masaksihan atol sa sun set higayong wala’y dag-um.
Gidugang pa ni Zambrano nga ag maong mga conjunctions, wala’y epekto sa lakat sa panahon ug maghatag lang kini og nindot nga talan-awon diha sa kawanangan.
Maghatag usab kini og historical event karong tuiga tungod kay talagsaon ra man kining mahitabo.
