BUTUAN CITY – Nalakip ang Barangay Mandamo ning syudad sa Butuan sa gipa-ilalom sa Modified Enhanced Community Quarantine (MECQ) sugod karong adlawa hangtod sa Setyembre 22 ning tuiga.
Sa eksklusibong pakighinabi sa Bombo Radyo Butuan, gibutyag ni Kapitan Jose Cataluña Jr. nga wala magkulang ang ilang barangay sa pagbalik-balik og pahinumdom sa mga residente nga kanunayng sundon ang mga minimum helath protocols.
Gani, naghatag na sila og internet connection sa ilang lugar aron maka-access ang mga residente ugaling magparehistro na alang sa ilang pagpabakuna dayong awhag sa mga residente sa nagkada-iyang purok nga magparehistro gilayon.
Giklaro usab ni Kapitan Cataluña nga dili kaayo daghan ang kaso sa COVID-19 sa ilang lugar ug sa nakalabayng adlaw, nakatala lang sila og duha ka kaso kansa ilang gika-alarma tungod kay bisan og layo na ang ilang barangay, na-abot gihapon kini sa maong virus.
Ubay-ubay na usab ang mga nagpabakuna sa ilang lugar gikan sa nalakip sa A4 hangtod A5 category ug ang gikabalak-an sa kapitan, ang kadaghan pa gihapon sa iyang mga constituents ang dili motuo sa COVID-19.
Duna gihapo’y daling motuo sa mga fake news sa mga social media.
Gipanawagan niini ang ilang mga residente nga magbinantayon kanunay ug musunod sa health protocols tungod kay lisog nga magka-COVID karon ilabina nga puno-puno na ang mga na-admit nga pasyente sa tanang ospital ning syudad ug maglisod na sila kung dalhon pa kini sa kasikbit nga lugar.
