BUTUAN CITY – Gikabiliban ug gihisgutan karon ang gipakitang pagkabayani sa Filipino surfer nga si Roger Casugay tungod sa pagluwas niini sa ka-agbat nga Indonesian surfer human nahulog sa surfing board samtang anaa sa tunga-tunga sa kompetisyon sa 2019 SEA Games sa lungsod sa San Juan, La Union kagahapon.
Nasayrang samtang dungan nga magpakita na unta sa ilang tagsa-tagsa nga tricks ang duha ka atlteta, nahulog ang Indonesian surfer nga si Arip Nurhidayat gikan sa surf board ug natangtang ang leash kon hikot niini nga gisumpay sa iyang tiil.
Dihang nabantayan sa coach sa Team Philippines nga gidagit palayo sa mga dagkong balod ang surf board sa langyaw, gi-sultihan niini ang event announcer nga ipinawagan sa Filipino surfer nga si Roger Casugay nga tabangan ang ka-agbat.
Tungod niini, samtang kamulo pagpakita og tricks gihunong kini ni Casugay ug giluwas ang Indonesian surfer gamit ang kaugalingong surfing board.
Namakpak sa tumang kalipay ug gibating dakong garbo ang mga delegado ug mga sectators dihang nakita nila nga sakay na ang duha sa surf board sa Pinoy surfer samtang pahabwa na sa baybayon.
Human sa gihimo ni Casugay, proud niining gibandera sa mga kababayang Pilipino ang bandila sa Pilipinas nga dala sa hingpit nga kalipay.
