BUTUAN CITY – Padayon ang pakig-alayon sa gobyerno sa Pilipinas ngadto sa ubang mga nasud ug trade partners sama sa China, Thailand, India, Japan, Brunei, ug South Korea aron masiguro ang igong supply sa lana sa nasud.
Sigon ni Pangulong Ferdinand Marcos Jr., maayo ang ilang pakig-istorya sa maong mga nasud tungod sa maayong relasyon rason nga andam mutabang panahon kung gikinahanglan.
Sigon sa pangulo, kinahanglang masiguro sa gobyerno ang igong supply sa enerhiya sa nasud sa ingon niini nga panahon nga wala pa’y siguro kung hangtud kanus-a matapos ang giyera sa tunga-tungang sidlakan.
Gawas sa lana, gipakusgan usab sa gobyerno ang supply sa kuryente sa nasud rason nga gila-umang mag-online na sa musunod nga 60 ka mga adlaw ang 23 ka mga power projects nga duna’y kinatibuk-ang kapasidad nga 900-megawatts.
Gawas niini, gigamit na usab in full capacity ang Malampaya natural gas aron madugangan pa ang energy supply sa nasud.
Samtang giklaro sa pangulo nga wala nalimtan sa gobyerno ang kahimtang sa mga Pinoy sa mga alanganing lugar sa Middle East rason nga nagpadayon ang repatriation effort aron masiguro ang ilang kaluwasan.
Base sa datus gikan niadtong Marso 5 hangtud 17, kapin na sa 1,400 ka mga overseas Filipino workers kon OFWs uban sa ilang 34 ka mga dependents ang naka-uli na dinhi sa nasud.
Nanawagan karon ang pangulo og panaghi-usa bayanihan taliwa sa gi-atubang karon nga hagit dili lang sa Pilipinas kondili apil na sa ubang mga nasud.
