BUTUAN CITY – Gipaneguro sa Philippine National Police (PNP) nga andam silang makig-alayon sa Senado para sa ikasang pagdungog mahitungod sa nahitabong rescue operations sa usa ka 14-anyos nga estudyante gikan sa usa ka british school sa Maynila nga biktima sa usa ka kidnapping incident.
Kini human makadawat og mga negatibong taho ang PNP nga nagkwestiyon sa legalidad ug kamatooran sa rescue operations sa nasangpit nga inisdente.
Sa usa ka pamahayag, gipasabot ni PNP Chief Gen. Rommel Francisco Marbil nga malampuson nga nabalik ang bata sa iyang pamilya apan bisan paman niini mahinungdanon usab nga makabaton og makuting imbestigasyon sa insidente aron matubag ang mga kabalaka og pangutana sa publiko ug maseguro ang integridad sa PNP.
Tungod kay Viral karun sa mga social media platforms ang mga pangagpas nga dili matud pa lehitimo ang operasyon ug wala matud pay rescue operations nga nahitabo tungod kay nakit-an ang bata sa mismong balay niini sukwahi sa mga nahimong pamahayag ni Department of Interior and Local Government (DILG) Secretary Jonvic Remulla.
Nakatakdang himoon ang pagdungog sa senado sa sunod nga semana.
