BUTUAN CITY- Narekober sa Philippine Coast Guard kon PCG ang tulo ka lawas sa dagat duol sa Baluk-Baluk Island, Basilan niadtong Domingo, kansa nagpataas sa death toll sa pagka-unlod sa M/V Trisha Kerstin 3 ngadto sa 57.
Sumala sa PCG, adunay 293 ka nakaluwas samtang 22 pa ang missing, base sa joint validation sa Philippine National Police-Scene of the Crime Operatives kon PNP-SOCO, City Disaster Risk Reduction and Management Office kon CDRRMO, Coast Guard District Southwestern Mindanao kon CGDSWM ug mga pamilya sa biktima nga nagpadayon sa koordinasyon sa search and rescue.
Kahinumduman nga ang barko milarga gikan sa Port of Zamboanga padulong Jolo, Sulu niadtong Enero 25 ug na-unlod sa Basilan niadtong Enero 26. Gani, gipasaka-an na usab og kaso sa Department of Transportation kon DOTr ang tulo ka opisyal sa MARINA nga nalambigit sa pag-isyu sa safety certificates sa barko, samtang giplano usab ang administrative cases aron bawi-on ug kanselahon ang Certificate of Public Convenience sa Aleson Shipping Lines kansa kasamtangang gi-suspendi ang operasyon.
Samtang gi-kwestyon usab ni 1-Rider Party-list Representative Ramon Rodrigo Gutierrez ang pag-lock sa mga life vest sa barko nga na-unlod. Base usab initial nga investigation sa DOTr, posibleng overloading ang hinungdan sa trahedya, base sa ihap sa mga lawas nga narecover, survivors nga naluwas, ug mga pasahero nga missing nga sobra sa kapasidad nga gitugot sa barko.
