BUTUAN CITY – Paningkamutan sa National Grid Corporation of the Philippines kon NGCP nga matapos og mas sayo sa gitakda nilang alas-sais unyang gabii ang 12-oras nilang power interruption.
Sigon ni Kristoffer Abellanosa – tigpamaba sa NGCP-District 2 Northeastern Mindanao Area, duna sila’y himuong upgrading ug maintenance works alang sa ilang Butuan sub-station.
Giklaro sa opisyal nga wala’y kalambigitan niini ang krisis sa lana tungod sa kagubot sa Middle East kondili pure maintenance lang ang ilang himuon.
Ma-apektuhan niini ang dakbayan sa Butuan gawas lang sa tulo ka barangay sa kasadpang bahin ug ang mga lungsod sa sidlakang bahin sa Agusan del Norte kon hangtud ngadto sa lungsod sa Kitcharao apil na ang mga lungsod sa Sibagat, pipila ka parte sa Esperanza ug Bayugan City sa Agusan del Sur.
Nasayrang niadto pa untang Marso 28 kini gihimo apan gisibog kini base sa hangyo ni Butuan City Rep Jose ‘Joeboy’ Aquino II tungod sa mga doktor nga naghimo og medical mission dinhi sa siyudad.
Alayon niini, ang Agusan del Norte Electric Cooperative, Inc kon ANECO ug Agusan del Sur Electric Cooperative kon ASELCO, muhimo usab sa ilang ride-on activities aron mamintina usab ang ilang mga linya sa kuryente.
