BUTUAN CITY – Gipirmahan na ni Butuan City Mayor Lawrence Lemuel Fortun ang giduso nga sugyot sa City Transportation and Traffic Management Department nga kunhuran ang penalidad ngadto sa mga makalapas sa balaod sa trapiko ning siyudad sa Butuan.
Sigon ni Maria Kristina E. Cassion, CTTMD head nga karun nga semana lang gipirmahan sa mayor ang maong sugyot human kini napalabang sa Sanguniang Bayan.
Pasabot pa niini nga ang gikunhuran nga penalidad kadto lang mga first time offenders diin sa Directional Violation o sama sa nakalapas sa No Left Turn og uban pa, giubsan ngadto sa 300 pesos gikan sa usa ka libo ka pesos sa unang kalapasan samtang sa ikaduhang paglapas anaa sa 900 pesos, ikatulong paglapas usa ka libo ka pesos ngadto na sa 5-mil pesos sa musunod nga paglapas inubanan na sa mandatory nga pagpailalom sa driver sa seminar.
Samtang sa gitawag nga safety violations, giubsan kini ngadto sa 500 pesos gikan sa kanhe 1,500 pesos alang sa unang paglapas samtang ang ikaduhang paglapas anaa sa usa ka libo ka pesos, 2-mil pesos sa ikatulo og 3-mil pesos sa musunod nga paglapas.
Mas taas matud pa ang safety violations tungod kay kinabuhi man gayud sa tawo ang mabutang niini sa alanganin. Naglakip kini sa illegal overtaking, walay early warning device o signal light lakip na ang walay helmet.
Gane dunay mga safety violations nga mas taas ang penalidad sama nalang sa depektibong headlight, walay tail light, og walay side mirror diin ang unang paglapas niini anaa sa usa ka libo ka pesos.
Gidugang usab ni Cassion ang Jay Walking nag dunay 100 pesos nga penalidad sa unang paglapas, 500 sa musunod og 1000 pesos sa ikatulo og musunod pang kalapasan. Mas taas usab ang sa kolurom nga anaa sa 1500 pesos.
Mapasalamaton na lang si Cassion kay Mayor Law Fortun tungod kay nabati niini ang ilang giduso nga sugyot nga sumala pa, masayud man gayud ang tawo samtang gilantaw usab ang kapasidad sa pagbayad sa tawo ilabina kay mas ubos ang minimum nga suhulan sa Butuan City.
Posibleng hingpit nga mapatuman ang maong ordinansa sa katapusang semana sa Marso o kaha sa unang mga adlaw sa Abril.
Mihangyu nalang kini sa mga drayber nga unta dili wala-on ang disiplina diha sa kadalanan tungod kay protection man kini kanila diin bisan og walay penalidad ibutang unta sa huna-huna nga luwas kining makauli sa pamilya.
