BUTUAN CITY – Hero’s burial ang gihatag sa Police Regional Office kon PRO-13 ngadto kang Police Executive Master Sergeant Jimmer Omisol sa may Uraya Cemetery sa Brgy. Bancasi ning siyudad sa Butuan.
Sa eksklusibong pakighinabi sa Bombo Radyo Butuan, gipadayag ni Police Lt. Col. Christian Rafols – information officer sa Police Regional Office kon PRO-13, gi-ila nilang bayani si PEMS Omisol tungod sa iyang pagsukol sa walo ka mga rebeldeng New People’s Army nga misulay unta pagdagit kaniya didto sa lungsod sa Carmen, Agusan del Norte.
Ang wala matud pa pagtugot ni Omisol nga himuon siyang bargaining set sa NPA maoy nagtukmod kaniyang ihalad ang iyang kinabuhi tungod og alang sa iyanggipanumpaang katungdanan.
Hugot matud pang gikondena ni PRO-13 regional director Police Brigadier General Gilberto DC Cruz ang gihimo sa mga rebelde ngadto sa maong pulis kansa dili tawhanon tungod kay taliwa nga walo sila og nag-inusara lang ang pulis, daghang mga bala ang ilang gitanom ngadto sa nagkada-iyang parte sa lawas niini.
Kini gawas pa sa paghimo-himo nila og istorya aron lang kunuhay ma-justify ang ilang gihimo taliwa nga mapamatud-an sa tanang mga tawong naka-agbat ni Omisol ang iyang pagka-maayong tawo.
Gi-escortan sa tanang hepe sa kapulisan sa mga lungsod ning lalawigan ang porlon nga gisakyan sa lungon sa opisyal gikan sa Camp Rafael Rodriguez padulong na sa lubnganan niini og gihatagan og 21-gun salute.
