BUTUAN CITY – Gikumpirma ni P/Supt. Christian Rafols – tigpamaba sa Police Regional Office kon PRO-13 nga nagpadala na og sample sa high-grade cocaine ang Philippine Drug Enforcement Agency kon PDEA- Central Office ngadto sa Drug Enforcement Agency kon DEA sa Estados Unidos.
Sa eksklusibing pakighinabi sa Bombo Radyo Butuan, gibutyag sa opisyal nga tumong niini nga sayron kung asa kini gikan.
Gidugang sa opisyal nga pinaagi sa tabang sa USDEA, masayran pinaagi sa dollar sign og uban pang signs nga gisulat sa matag-putos niini, kung asa nga nasud kini giproseso.
Ang resulta matud pa niini nga sample test ang ilang gihulat adiser himuon ang pagguba niini nga mga ginadiling druga pinaagi sa himuong public destruction base na usab sa kamanduan sa ilang mga tag-as nga opisyal.
Nasayrang sa tibuok nasud, dinhi sa Caraga Region ang duna’y pinakadaghang nakuhang floating cocaine.
Giklaro sa opisyal nga ang gihatag nga value sa Dangerous Drugs Board sa nakuha nga mga cocaine dili updated rason ngas mudako matud pa ang balor niini kung kini ma-update na.
Sa kasamtangan mu-abot lang sa 5-mil pesos ang kada-kilo sa cocaine base sa 1980 nga Dangerous Drugs Board kon DDB value kumpara sa mas mahal nga DDB value karon sa shabu nga mukabat sa 11-mil pesos kada-kilo. (Beth Ruiz)
