BUTUAN CITY – Gipaneguro ni Pangulong Ferdinand Marcos Jr., nga dunay igong suplay sa lana ug kuryente sa nasud.
Sigon sa Pangulo nga nakig-estorya na siya sa mga nasud nga trade partner sa Pilipinas sama sa India apan gidool usab ang China, Japan, Brunei, og South Korea mahitungod sa posibleng supply arrangement.
Pagbutyag pa niini nga maayo ang dagan sa panag-estorya dayung pag-ila sa pakighigala sa maong mga nasud nga andam matud pang motabang sa Pilipinas.
Sa suplay usab sa kuryente, giestorya matud pa sa pangulo ang mga power generation company aron madugangan pa ang kapasidad sa mga grid sa musunod nga 60 ka adlaw.
Duna matud pay 23 ka power projects nag dunay kapasidad nga 900 mega watts ang laumang mag-online aron makatabang sa suplay. Samtang padayon usab ang koordinasyon sa Malampaya natural gas nga full capacity aron madugangan usab ang suplay sa kuryente.
Gitaho usab ni Pangulong Ferdinand Marcos Jr. ang gihimo niini sa sektor sa transportasyon dayung pamugos nga dili usbawan ang plitehan.
Sigon pa niini nga dunay mga libreng sakay program sa tibook nasud sama sa Metro Manila, Metro Cebu og Metro Davao.
Lakip na usab sa LRT 2 og MRT 3 nga dunay 50 porsiento nga diskuwento sugod karung adlawa March 23.
Kini gawas pa sa nagpadayon nga pag-apod-apod sa mga cash og relief assistance sa nagkadaiyang ahensiya.
Samtang liboang mga benipisayaryo na usab sa fuel subsidy.
