BUTUAN CITY – Naghatag og kadasig sa mga membro sa Kabus Padatoon kon KAPA Community Ministry International Incorporated sa Surigao City ang pagpamulong ni KAPA founder Joel Apolinario atol sa ilang prayer rally kagabii.
Nasayrang gatusang mga membro ang misalmot sa prayer rally nga gipahigayon sa Surigao del Norte provincial grandstand sa pangindahay nga dunggon sa kagamhanan ang ilang hangyong ibalik ang operasyon sa KAPA aron padayon matud pa nilang madawat ang ilang binulan nga blessing.
Gisugdan kini pinaagi sa usa ka motorkada pasado alas-dos sa hapon gikan sa City Boulevard hangtud na sa Provincial grandstand og sa mismong rali, gihatagan og higayon ang mga membro nga mupadayag sa ilang mga kasinatian ilabina sa natabang sa KAPA ngadto sa ilang kalisod.
Nadasig ang mga KAPA members human namulong si Apolinario pinaagi lamang sa phone match kinsa naghatag kanila og suporta uban sa hangyong i-ampo nga mabalik ang ilang operasyon.
Human sa pagpamulong ni Apolinario, gisunod nila ang candle lighting og ang pagkanta sa ilang KAPA theme song nga ‘If We Hold On Together’ dayong singgit sa ilang tinguhang ipabalik ang ilang operasyon.
Mahinumdumang kini na ang ikaduhang prayer rally nga gipahigayon sa maong siyudad sunod niadtong Hunyo 12 nga gihimo sa Luneta Park.
