BUTUAN CITY – Aminado si Pangulong Rodrigo Duterte nga dili siya segurado kung magpabilin pa bang higala sa Pilipinas ang China.
Gipadayag kini sa pangulo atol sa rally sa PDP-Laban sa Cabadbaran City sa lalawigan sa Agusan del Norte kagabii.
Sa iyang pagpamulong, gipadayag sa presidente nga tungod sa pag-away nila kanhi Pangulong Noynoy Aquino og kanhi Foreign Affairs Sec. Albert del Rosario, duna na’y mantsa ang maayong relasyon tali sa duha ka nasud nga iyang gipaningkamutan.
Gibirahan pa sa pangulo ang duha ka mga kanhi opisyal tungod sa pagpunay og halhal kaniya kalabot sa arbitral ruling sa may West Philippine Sea nga wala matud pa barugi sa iyang administrasyon.
Kini taliwa nga sa ilang panahon o administrasyon matud pa nagsugod ang pagpasagad sa ownership claim sa Pilipinas sa maong parte sa dagat particular sa Scarborough Island.
Gipasabot pa sa presidente nga dihang gidungog pa sa arbitral court ang mga claims sa duha ka nasud, sige na og construct og artificial island ang China kansa gibalewala lang sa Pilipinas og wala usab gibaraw sa Amerika.
Mamahimo matud pa niyang himuon ang pagbaraw sa China apan segurado siyang muresulta kini sa pagkapulpog sa tanan niyang kasundaluhan og kapulisan rason nga sa istorya lang niya makaya pagkumbinsi ang China kalabot usab sa claim sa Pilipinas sa high seas.
Karong nakompleto na matud pa kini nga mura na og kampo, siya na ang basulon sa tanan og ipangbato.
