BUTUAN CITY – Gisaway ni Kamanggagawa partylist Rep Eli San Fernando ang pamahayag ni Pangulong Bongbong Marcos nga normal ra matud pa ang tanan karon taliwa sa krisis nga hatud sa giyera sa Middle East.
Sa eksklusibong pakighinabi sa Bombo Radyo Philippines, gipadayag ni San Fernando nga tungod sa nagpadayong giyera, dapat anaa na sa crisis o kaha emergency mode ang gobyerno, rason nga alarming matud pa ang pamahayag sa pangulo nga normal lang ang nagapanghitabo karon.
Sigon sa magbabalaud, dili makonsiderang normal ang dagan karon sa mga panghitabo ilabina nga sa musunod nga mga adlaw ug semana, musipa pa ngadto sa 120-pisos ang matag-litro sa krudo ug padayon pang musaka.
Segurado usab siya sa domino effect niini ilabina sa pagsaka sa presyo sa mga batakang palaliton ug mga serbisyo nga gila-umang musumpay pa sa ubang mga isyu nga maoy angayang pangandaman sa kagamhanan.
Makasusubo matud pang palandungon nga wala’y kongkretong solusyon nga nahatag ang gobyerno karon gawas lang sa pagpanghatag og ayuda nga dili mulahutay kansa dinaliang relief lang sa katawhan.
Wala matud pa’y komprehensibong plano ang gobyerno aron mapugngan man lang ang padayong pagsaka sa presyo sa mga produktong petrolyo.
Ang mas nakasakit, kay wala matud pa’y plano o lakang nga gihimo ang gobyerno alang sa pagpasaka sa suhulan sa mga trabahante aron makatapal-tapal sa grabe kataas na nga inadlaw’ng galastuhan.
