BUTUAN CITY- Dakong pangutana matud pa ang nahimong pamahag ni Presidente Ferdinand Marcos Jr. nga daw walay angay kabalak-an tungod normal ug adunay igong supply sa petrolyo.
Sumala ni Ritchie Ravelo, Federation President sa Eastern Suburb Four-Seater Toda, nga ang pamahayag sa Presidente usa ka dakong pangutana tungod nasinati sa katawhan ang bigtime nga pagsaka sa presyo kansa doble pa sa kasagaran, gani nagpanik buying ang publiko tungod sa kahadlok nga taman ra Abril ang reserba.
Sigon pa niini, nga ang gipagawas nga pamahayag sa gobyerno daw usa lang ka instrumento aron ipakalma ang katawhan, sama sa gibutyag ni Department of Energy Secretary Sharon Garin nga adunay igo nga supply, apan nagpabilin ang kabalaka sa publiko nga naglisod na sa pagsagubang sa taas nga presyo sa produktong petrolyo.
Gipunting usab ni Ravelo nga kaniadto sa panagbangi sa Iraq ug Kuwait, wala masinati ang ingon kadako nga pagsaka sa presyo sama karon. Giklaeo pa niini, nga ang gobyerno adunay “rule” nga ipakalma ang katawhan aron malikayan ang kagubot, apan klaro na nga nasinati na sa mga katawhan ang kalisod ug kakulang sa pondo.
Gani ang kahimtang karon nagpugos sa mga motorista nga magpanaga sa pagtubil tungod sa kahadlok nga mosamot pa ang pagsaka sa presyo, ug nagpahimangno nga kon dili masulbad dayon, mahimong masamdan ang transport sector ug panginabuhi sa katawhan.
