BUTUAN CITY- Nagkamulo karun ang Pakistan sa pagpangandam nga mag-host og peace talks tali sa Estados Unidos ug Iran taliwala sa minggrabe nga tensyon sa Middle East.
Sumala ni Foreign Minister Ishaq Dar, nga adunay pagbinayloay og mensahe ang duha ka kampo nga gipaagi sa Islamabad, ug bukas ang Pakistan nga mahimong neutral ground alang sa direktang panaghisgot.
Suportado sa Egypt, Saudi Arabia, Turkey, China, ug United Nations ang inisyatiba, kansa nagtumong nga malikayan ang paggrabe sa kagubot.
Samtang nagpabiling kritikal ang Tehran ug padayon nga nag-aligar nga adunay plano ang Washington alang sa usa ka ground assault, samtang ang US mingbutyag nga adunay “productive conversations” nga nahitabo apan wala pay klaro nga commitment.
Bisan pa sa suporta gikan sa rehiyon, nagpabiling hagit ang lawom nga kawalay pagsalig tali sa duha ka nasud, ini magdepende sa umaabot nga mga semana kung ang diplomasya mamunga ba o magpabilin nga retorika lang.
