BUTUAN CITY – Dinhi sa Pilipinas, wala’y magbuot kanato kung unsa nga sapatos ang atong suuton ilabina sa mga high heels sa kababayen-an.
Apan didto sa siyudad sa Carmel-by-the-Sea, California, usa ka ordinansa ang nagpatuman nga ang bisan kinsa nga magsul-ob og sapatos nga adunay mga tikod nga sobra sa duha ka pulgadas ang gitas-on ug adunay gilapdon nga ubos sa usa ka pulgada, kinahanglang mokuha una og permit gikan sa city hall.
Ang balaod gipatuman niadto pang tuig 1963 aron mapanalipdan ang mga lokal nga kagamhanan gikan sa posibleng mga kaso tungod sa mga gamot sa mga karaan ug dagkong punoan sa kahoy sa maong siyudad, nga posibleng makabalda ang mga magbaklay ilabina niadtong nagsul-ob og high-heeled shoes.
Ang permit nagsilbi nga pahinumdom sa mga residente ug turista nga peligro kini nga klase sa sapatos, ug kung masamdan, dili makapasaka og kaso batok sa maong siyudad. Bisan dili istrikto nga pagpatuman, ang mga permit mahimong makuha nga walay bayad sa city hall.
Daghang mga turista ang nagkuha niini ingon usa ka souvenir. Nailhan usab ang Carmel-by-the-Sea sa ubang dili kasarangan nga mga balaod, sama sa pagdili kaniadto sa pagkaon og ice cream sa downtown area aron magpabiling limpyo ang kadalanan.
