BUTUAN CITY – Gi-angkon na sa rebeldeng grupong New People’s Army kon NPA nga sila ang responsable sa pagpusil-patay kang Police Executive Master Sergeant kon PEMS Jimmer Omisol kagabii sa national highway sa District Papaya, Brgy. Tagcatong, Carmen, Agusan del Norte.
Sa eksklusibong pakighinabi sa Bombo Radyo Butuan, gipadayag ni Ka Omar Ibarra, nagpa-ilang tigpamaba sa NPA-Western Agusan del Norte-Agusan del Sur kon NPA-WANAS sub-regional command, nga ang ilang tropa sa North Central Mindanao Region ang gitahasan aron unta dis-armahan lang og pakig-sitoryahan si Omisol apan mipakita matud pa kini og dautang lihok taliwa nga gipahibalo na kining NPA ang iyang naka-atubang rason nga gipusil kini nga maoy hinungdan sa iyang kamatayon.
Nakumpiska gikan sa biktima ang usa ka 9mm pistol og mga buhing bala niini.
Gipasabot pa niini nga ang pipila ka mga sumbong batuk kang Omisol sa iyang pagtu-is matud pa sa ilang tahas diha sa pagpamulis ang rason nga gilusad sa ilang mga ka-ubanan ang operasyon.
Tumong lamang unta sa operasyon nga sayran ang maong pulis kalabot sa mga alegasyong gibato kaniya aron unta matud pa mapahimangnuan og dili na usbon pa apan misukol kini rason nga gipusil na lang.
