BUTUAN CITY- Dugay ra matud pa nga gipanday sa transport sector ang gi-ingong pagsuspende sa excise tax sa produktong petrolyo.
Sumala ni Ritchie Ravelo, Federation President sa Eastern Suburb Four-Seater Toda nga ang paghatag sa kongreso og Emergency power kang President Ferdinand Marcos Jr. aron nga isuspende ang excise tax sa produktong Petrolyo, kinahanglan nga mapatuman hilabina sa kasamtangang nasinati nga krisis sa produktong lana.
Sigon pa ni Ravelo, nga isip usa ka yano nga tricycle driver, makapalipay na kini alang kaniya ang pagwagtang ingon man suspende sa excise tax sa krudo, gani usa ka maayong lakang matud pa ugaling matoman ang maong temporaryo nga pagsuspendi bisan paman nga ginagmay, basta dili direkta nga maka-apekto ang maong problema sa mga tricycle driver.
Gibutyag usab niini, nga maong lakang sa gobyerno usa lang ka temporary solution diin base sa Department of Finance kon DOF nga mokabat og pila ka billion ang mawala sa panudlanan sa gobyerno kung wagtangon ang excise tax.
Gipasidaanan usab ni Ravelo ang kaubanan niini nga mga tricycle driver nga dili magpataka ug dagan, hilabi na ang mga walay klarong ruta.
Matod pa niya, sa ilang operasyon sa Ampayon Public Merkado adunay klarong ruta sa pagsulod ug paggawas ug adunay parking area nga gigamit matag buntag ug hapon, busa dili kaayo apektado ang ilang biyahe ug malikayan ang warik-warik, mga driver nga naglibot-libot lang.
Gibutyag usab ni Ravelo nga kabalo na sila kung unsay angay buhaton aron makatipid, apan tungod sa pagsaka sa presyo sa lana dili na sama sa una nga makapakatubil pa og ₱30 ug dali ra mabawi.
Gani karun, mas mahal na ang krudo ug daghan na usab ang mga tricycle driver nga sama nila nga nagkinabuhi ra sa yano nga panginabuhi, busa kinahanglan matud pa nga magtinabangay ug magmatngon sa paggamit sa lana.
