BUTUAN CITY – Dugay na matud pang nasayod ang tanan sa UniTeam nga mukanaog gayod sa iyang pwesto sa gabinete ni Pangulong Ferdinand Marcos Jr., si Vice President Sara Duterte ilabina nga dugay rang nabungkag ang nasangpit nga partido ug ang ilang gihulatan mao na lang ang tukmang adlaw sa paghimo ni VP Sara niini.
Sa eksklusibong pakighinabi sa Bombo Radyo Butuan, gibutyag ni Partido Manggagawa spokesperson Wilson Fortaleza, nga nagsugod ang lamat sa Marcos-Duterte team, dihang usa ka tuig pa lang ang Marcos administration ug kini gumikan sa binatuay og akusasyon tali nila Pangulong Bongbong Marcos ug kanhi Pangulong Rodrigo Duterte nga amahan sa besi presidente.
Extension lang matud pa ang gihimo ni VP Sara sa una nang mga nagapanghitabo dihang inanay pang nabungkag ang UniTeam.
Wala matud pa malilong sa tanan ang lamat sa kwalisyon dihang ang mga ka-alyadong mga membro sa gabinete ug sa kamara sa mga Duterte, gipangtangtang sa ilang pwesto.
Dugang pa ni Fortaleza, wala matud pa’y natabang sa Department of Education si VP Sara tungod kay ‘zero experience’ kini sa pagpadagan sa edukasyon.
Kini matud pa ang nakapa-it sa political accommodation kansa mao ang orihinal nga sala sa Marcos administration nga naka-apekto og dako sa maong sektor.
Malikayan matud pa unta kini kung ang gibutang sa maong posisyon, kadtong duna’y saktong kasinatian ug dugay nang nagtrabaho sa maong departamento.
