DAVAO CITY – Gilayon nga giposasan sa Bunawan Police Station ang usa ka lalaking nagpaila nga bodyguard ni Kapa Founder Pastor Joel Apolinario gumikan sa dili niini lisensyadong pusil.
Nailhan ang suspek nga si Edilberto Naupan, 44 anyos ug residente sa Bislig Surigao del Sur kansa nasikop human nga makuhaan kini sa checkpoint og .45 kalibre nga pistola kagahapong adlawa.
Walay mapakita nga mga dokumento ang suspek.
Nasayran nga pasulod unta sa dakbayan sa Davao si Naupan gikan sa Surigao City apan nasikop kini sa mga otoridad human nga miagi kini sa checkpoint sa Task Force Davao ug Bunawan Police Station.
Gawas sa pistola, nakuha usab gikan sa sakyanan sa suspek ang 13 ka mga bala sa .45 caliber pistol, lima ka box nga adunay 77 ka mga bala sa .22 long rifle ingon man walo ka bundle sa tig P500,000 nga muabot ngadto sa 4 million pesos.
Sumala ni Police Major Noel Villahermosa, station commander sa Bunawan Police Station nga pay out matud pa ni Naupan ang nasangpit nga kwarta gikan sa KAPA Investment Scheme.
Nasayrang gisulayan pa sa suspek nga bay-ran si Police Corporal Alicer Cañete sa kantidad nga 6,500 aron dili sya dakpon niini apan gikustodiya gihapon siya sa Bunawan Police Station
