BUTUAN CITY- Gimando ni Presidente Ferdinand “Bongbong” Marcos Jr. ang pagpagawas sa P321 milyon nga pondo alang sa 34 ka probinsya ug walo ka siyudad nga nadaot sa Bagyong Basyang ug shear line.
Lakip sa mga probinsya nga makadawat sa maong tabang mao ang Surigao del Sur, Surigao del Norte, Dinagat Islands, Agusan del Norte, Agusan del Sur, Misamis Oriental, Misamis Occidental, Lanao del Norte, Davao de Oro, Davao del Norte, Bukidnon, Camiguin, ug Zamboanga del Norte.
Sa Visayas mao ang Negros Oriental, Negros Occidental, Bohol, Capiz, Aklan, Leyte, Cebu, Iloilo, Eastern Samar, Southern Leyte, Antique, Siquijor, Samar, ug Northern Samar.
Sa Luzon, Catanduanes, Camarines Sur, Sorsogon, Masbate, Camarines Norte, Occidental Mindoro, ug Oriental Mindoro. Ang walo ka siyudad nga makadawat og hinabang mao ang Iligan, Cagayan de Oro, Bacolod, Butuan City, Cebu City, Zamboanga City, Iloilo City, ug Mandaue City.
Gipadala ang direktiba pinaagi kang Executive Secretary Ralph Recto diin mipasalig sa paspas nga paghatod sa pinansyal nga tabang ngadto sa mga Local Government Unit kon LGU.
Gipahinumdom usab sa Presidente nga ang bag-ong kalamidad nakapahinabog pagbakwit, pagkamatay sa labing menos 12 ka tawo ug dako nga kadaot sa imprastraktura, ug mingbutyag nga gamiton ang pondo alang sa rehabilitasyon ug tabang sa mga nawad-an og pinuy-anan.
Gimando usab ang dagkong river clearing operations ug flood mitigation measures aron malikayan ang umaabot nga pagbaha, samtang gipirmahan ang Memorandum of Agreement tali sa DepEd ug LGUs alang sa massive classroom building program sa tibuok nasud.
