BUTUAN CITY – Gibana-banang mukabat sa 200-mil pesos ang damyos human gilamoy sa kalayo kagahapon sa kaadlawon ang kiln dry section sa Chiba Furniture and Export Component nga nahimutang Purok 7, Brgy. Ampayon ning siyudad sa Butuan.
Sigon ni SFO1 Edmar Aguillon – ground commander sa Bureau of Fire Protection kon BFP-Butuan, gi-isa sa 3rd alarm ang sunog nga milungtad og pito ka oras adiser nadeklarang fireout kaganinang alas-onse sa buntag.
Sa eksklusibong pakighinabi sa Bombo Radyo Butuan, gibutyag sa opisyal nga electrical short circuit ang hinungdan sa pag-ulo sa kalayo human gibutyag sa usa sa mga trabahante nga nakadungog matud pa sila og spark sa kiln dry section adiser midilaab ang kalayo.
Wala na nikaylap pa sa laing section sa maong furniture shop ang kalayo human malampusong na-contain sa mga bombero rason nga ang nadamyos mao lang ang mga hilaw nga kahoy og electrical equipment sa sulod nga bahin.
