BUTUAN CITY- Personal nga mingdangop ning sibyahan ang usa ka magtutunga sa Caraga States University Main Campus nga si Renato Paril II aron nga ipadangat kanato ang iyang mga kasinatian, adbokasiya, ug makapadasig nga panaw isip kabatan-onan, person with disability ingon man isip usa ka Outstanding Youth Achievers.
Sumala pa ni Paril, nga gikan sa 30 ka partisipante, napili na lamang ang 15 ka finalists kansa pormal nga pagapasidunggan sa 11th Annual Butuanon Choice Award nga ipahigayon sa Balanghai Hotel karong Mayo 15, 2026.
Dako usab ang iyang pasalamat sa mga nag-organisa sa maong kalihokan tungod sa paghatag og plataporma aron mapadayag ang iyang mga adbokasiya nga nagpunting sa kabatan-onan ug agrikultura, lakip ang pag-awhag sa aktibong partisipasyon sa komunidad.
Gipasabot usab ni Paril nga ang kapansanan dili babag aron makahatag og positibong kontribusyon sa katilingban, ug mahimong inspirasyon sa uban nga magpadayon sa ilang mga pangandoy.
Dugang pa niini nga sa panahon sa nagkalain-laing krisis, gikinahanglan ang lig-on nga panaghiusa ug kooperasyon sa matag sektor aron masiguro ang padayon nga kalamboan, ilabi na sa lokal nga komunidad sa dakbayan sa Butuan.
