BUTUAN CITY- Gipasalig sa Office of the Ombudsman nga andam sila sa pagtubag sa petisyon nga gi-file ni kanhi Ako-Bicol Partylist Rep. Zaldy Co sa Korte Suprema.
Sigon ni Assistant Ombudsman Mico Clavano nga ilahang ipresentar ang kontra-argumento sa ilang komento, human gimando-an sa En Banc Session sa Supreme Court niadtong Miyerkules ang Ombudsman ug Independent Commission for Infrastructure kon ICI nga magsumite og tubag sulod sa napulo ka adlaw.
Gipakomento usab sila sa hangyo ni Co nga magpagawas og Temporary Restraining Order, apan gipatin-aw sa Korte Suprema nga wala pa kini magpagawas og ingon nga kamanduan. Gipangayo sa petisyon nga ibasura ang resolusyon sa Ombudsman nga makasuhan si Co og graft ug malversation sa Sandiganbayan.
Nagtuo ang kanhi magbabalaod nga adunay “grave abuse of discretion” sa resolusyon bisan pa man nga wala kini girekomenda sa ICI nga mapasakahan og kaso.
