BUTUAN CITY – Dismayado ang National Union of Journalists of the Philippines kon NUJP sa pagbalibad sa Department of Public Works and Highways kon DPWH-Surigao del Norte 2nd District Engineering Office, paghatag sa ilang pagpasabot.
May kalabutan kini sa nadiskubrehang flood control structure sa may Kinabutan River sakop sa Villa Carito, Purok Kalipayan, Brgy Washington, Surigao City kansa taliwa nga na-report na nila nga completed niadtong Pebrero 26, 2024.
Sigon ni NUJP-Surigao del Norte chapter chairman Edito Mapayo, ang nasangpit nga proyekto, gitrabaho sa Monolithic Construction and Concrete Products Inc. kansa usa ka regular infrastructure project nga gipunduhan sa General Appropriations Act kon GAA 2024 00-2.
Apan dihang iyang gi-inspeksyon ang project site ning mi-aging semana, nasuta nga wala kini sheet piles nga mao unta’y maghatag og structural support, nga maoy gikinahanglan sa mga excavation ug earth retention projects.
Sa iyang pagduol sa maong buhatan, gitambagan pa kining magpadala og sulat-hangyo alang sa interview apan dihang nakasubmite na siya sa iyang sulat, gisultihan na lang siya sa staff sa district engineer nga dili na kini magpa-interview pa.
