BUTUAN CITY – Gikumpirma sa Bureau of Quarantine nga wala pa sila’y nadiskubre nga bag-ong kaso sa Nipah virus dinhi sa Pilipinas human ang katapusang natala nga kaso sa Sultan Kudarat niadtong tuig 2014.
Sa pagkakaron, gibutyag ni BOQ officer-in-charge Dr. Roberto Salvado nga wala pa silay na-monitor o napugngan nga misulod sa nasod nga infected sa virus gikan sa mga direct flights gikan sa India, diin adunay natala nga seasonal outbreak sa maong sakit.
Bisan pa man niini, gipaniguro sa bureau ngadto sa publiko nga aduna nay mga andam nga safety health measures, lakip na ang hugot ug padayon nga pagbantay sa mga biyahero nga mu-abot sa mga tugpahanan ug pantalan 24/7 aron mapugngan ang pagsulod ug pagkaylap sa virus sa nasod.
Gawas niini, aduna usab silay e-Travel system nga gigamit alang sa border control, health surveillance, ug economic analysis. Pinaagi niini nga aplikasyon, mas sayon nga ma-monitor ang mga pasahero gikan sa mga direct flights sama sa India.
