BUTUAN CITY – Gipasalig sa Department of Health (DOH) nga andam ang Pilipinas batok sa Nipah virus – usa ka pinasahing zoonotic disease nga gikan sa mga hayop sama sa paniki, baboy, ug kabayo.
Una kining nadiskobrehan sa Malaysia ug Singapore ug adunay seasonal outbreaks sa Bangladesh ug India kondiin bag-uhay lang, lima ka kaso na ang na-report sa India.
Dinhi sa Pilipinas, nadiskobrehan kini sa Sultan Kudarat niadtong 2014 diin adunay 17 ka kaso nga nakuha pinaagi sa pagkaon ug karne sa kabayo ug kontak sa mga duna’y impeksyon ug human niini, wala na’y laing kaso nga na-report.
Padayon ang DOH sa surveillance ug nagpagawas ug updated guidelines sa 2023 samtang ang Bureau of Quarantine nagbantay sa tanang tugpahanan ug pantalan sulod sa 24-oras.
Gipahimangnoan usab ang publiko nga likayan ang kontak sa masakiton nga hayop, siguruhon nga aprubado ang karne sa National Meat Inspection Service, ug lutoon ug maayo ang pagkaon.
