BUTUAN CITY – Pipila na ka mga lungsod sa Surigao del Sur ang nagpatuman og ‘No Sailing’ policy isip pagsunod sa Memorandum Order nga gipagawas ni Governor Alexander ‘Ayec’ Pimentel tungod sa hulgang hatud sa tropcal depression Dante nga mikusog na karon ngadto sa tropical storm.
Apil na sa nagpatuman niini ang lokal nga kagamhanan sa lungsod sa Hinatuan pinaagi sa public advisory nga gipagawas kagahapong adlawa ni Mayor Shem Garay.
Tumong niini nga masiguro ang kaluwasan sa tanan dayong awhag sa iyang mga constituents nga magbantay kanunay sa mga weather updates ug ipagawas niyang kamanduan.
Una nang temporaryong gidid-an sa lokal nga kagamhanan sa Tandag City sa susamang lalawigan ang pagpalawod sa mga sakyanang pandagat apil na ang pagkaligo sa dagat tungod sa susamang rason.
Sigon ni Vitchie Bandoy, hepe sa Tandag City Disaster Risk Reduction and Management Office (CDRMMO), ang kamanduan gipagawas ni Mayor Roxanne Pimentel tungod gihapon sa hulgang hatud sa maong bagyo.
Alayon niini, gipahinumduman ang tanan nga magmatngon tungod sa mga posibleng pagbaha o pagdahili sa yuta na mahatud sa maong bagyo higayong mukusog ang pagbundak sa ulan.
Nasayrang ang Tandag City ug lain pang 15 ka mga LGUs sa Surigao del Sur, nahimutang kilid sa dagat.
