BUTUAN CITY – Gisugdan na karong adlawa, Lunes, Marso 24, ang hingpit nga pagpatuman sa “No Jaywalking Policy” dinhi sa Butuan City human sa usa ka buwan nga information dissemination ug pahimangno aron malikayan ang paglapas niini.
Sa pagpatuman sa anti-jaywalking ordinance, gi-awhag ang publiko nga sundon ang regulasyon pinaagi sa paggamit sa overpass ug pedestrian lanes aron masiguro ang luwas nga pagtabok sa kalsada.
Ang mga senior citizens ug persons with disabilities kon PWDs nga lisod makasaka sa overpass o makalabang sa pedestrian lane, gidasig nga modangop sa mga assigned traffic aides alang sa tabang o assistance. Ang hugot nga pagpatuman sa maong palisiya makatabang sa pagpakunhod sa aksidente sa kalsada ug sa pagpalig-on sa disiplina sa trapiko.
Mi-ani usab og managlahing reaksyon gikan sa katawhan ang unang adlaw sa pagpatuman niini kondiin duna’y uban nga na-anad na samtang ang uban, nakuratan dihang gibadlong sa mga traffic enforcers ug gipahimangnuan nga multahan na sa sunod nilang kalapasan.
Nasayrang ang multa alang sa unang paglapas sa “No Jaywalking Policy” mu-abot sa P100.00 samtang, P500.00 usab sa ikaduha, ug P1,000.00 sa ikatulo ug sunod-sunod nga kalapasan base sa City Ordinance No. 7026-2023 o mas na-ilang Transportation and Traffic Management Code
