BUTUAN CITY – Padayon pang gipanubayan sa Butuan City Police Station kon BCPS1 ang pagpusil-patay sa usa ka negosyanteng Intsik pasado alas-8:20 kagabii sa may P. Burgos Extension ning siyudad.
Naila ang biktimang si Ashley Lian, 33-anyos, minyo, tag-iya og manager sa UniCity General Mechandise og nagpuyo sa Brgy. Tandang Sora ning siyudad. Nasayrang gidala pa ang biktima sa usa ka pribadong ospital apan nakabsan gihapon kini sa kinabuhi paglabay sa pipila ka gutlo.
Sigon ni SPO1 Ronald Bitangcor sa Butuan City Police Station kon BCPS1, pag-abot pa lang sa biktima uban sa iyang asawa sa gate sa apartment nga ilang gipuy-an, gitiro sa wala pa mailang suspek nga sakay sa motorsiklo ang biktima.
Padayon pa ang pagpalawo sa ilang imbestigasyon ilabina nga dili makaabot og dili makamaong musulti og pinulungang Ingles ang asawa sa biktima. Nasayrang sakay ang duha sa de-pasayruang traysikol og lakip sa ilang gisuta ang motibo sa kremin.
Base sa inisyal nilang pakisusi, mi-assume pagpanag-iya sa maong tindahan ang biktima niadtong Agusto 15 ning mi-aging tuig.
Narekober sa crime scene ang duha ka mga bala sa wala pa matinong kalibre sa pistola. (Beth Ruiz)
