BUTUAN CITY – Hingpit nang napasakaan og kaso pinaagi sa inquest proceedings ang usa ka negosyanteng Chinese nga nadakpan human gireklamo og pagpangopya og trademark sa usa ka local businessman sa Surigao City.
Gi-ila ni National Bureau of Investigation kon NBI-Caraga regional director Mario Minor ang suspek nga si Andy Smith Gambo Yao og naila usab nga si Zhang Maoying, 28-anyos, ulitawo og proprietor sa Smith Rice Trade Store nga nahimutang sa Sarvida St., Brgy. Taft sa maong siyudad.
Sigon ni NBI-Caraga regional director Mario Minor, sa eksklusibong pakighinabi sa Bombo Radyo Butuan, mga kasong paglapas sa Section 165 og 168 sa Republic Act 8293 kon mas nailang Intellectual Property Code of the Philippines partikular ang entrenchment of trademark ang gipasaka batuk sa suspek.
Kini human nakuha gikan sa iyang pwesto ang 400 ka mga sakong bugas nga duna’y trademark nga Square Line.
Dugang ni Minor, ilang gi-raid ang pwesto sa negosyante human gireklamo sa negosyanteng si Michael Galo – general manager sa Hervick Agro Industrial Corporation, nga nangopya sa trademark sa iyang negosyong sinakong bugas nga wala mananghid kaniya.
Gibutyag ni Director Minor nga mihimo pa siya og test buy human ang reklamo og nakumpirma kini rason nga nag-apply sila og search warrant nga milampos usab dihang ilang gi-serve kagahapong adlawa.
