BUTUAN CITY – Nag-atubang sa kasong paglapas sa RA 10591 ug COMELEC gun ban ang nasikop nga negosyanteng Hapon ug laing lima ka Pinoy nga kauban niini human gibara kagahapon ang ilang gisakyang MUX sa may Brgy. Ampayon, ning siyudad sa Butuan.
Naila ang Hapon nga si Yuwitshi Sasaki, 77-anyos, minyo og kasamtangang nagpuyo sa Don Pedro corner Arellano Sts., Metro Manila samtang ang iyang mga ka-ubanang Pinoy nailang sila Christopher Duazo, 30 anyos, ulitawo driver og residenti sa Purok 8, Brgy. Tolosa, Cabadbaran City, Agusan del Norte; Ronnie Salahay, 38 anyos, mag-uuma, residenti sa Purok 8, Brgy. Padiay, SIbagat, Agusan del Sur; Nelson Mabandos, 36 anyos, residenti sa Purok 1, Brgy. San Juan, Bayugan City, Agusan del Sur; ug usa ka Julius Mabandos, 39 anyos, negosyante, usa ka tribal leader ug residenti sa J. Satorre St. Emelia Highway, Brgy. Holy Redeemer ning syudad sa Butuan.
Nakuha sulod sa sakyanan ang usa ka 12 gauge shotgun nga giputos ug sako ug gitago-an ilalum sa lingkoranan, 13 nga mga buhing bala, laing usa ka kalibre 45 nga pistola nga gibutang ilalom sa passenger set uban sa pito ka mga buhing bala ug itom nga holster.
Sigon ni Police Captain Emerson Alipit, duna matod pa’y adtuang abaca ang grupo dihang nababagan sila sa checkpoint.
