BUTUAN CITY – Ningpanaw na ang National Basketball Association kon NBA Hall of Famer nga si Dikembe Mutombo sa edad nga 58-anyos, base sa pagkumpirma ni NBA Commissioner Adam Silver, tungod sa brain cancer. Sumala ni Silver, dili malimtan sa NBA world ang kamaayo ni Mutombo sa depensa ilabina sa titulo niining greatest shot blocker ug defensive player sa kasaysayan sa NBA.
Kahibaloang nahimong eight-time NBA All-Star player ang maong magdudula ug upat ka higayon usab kining nahimong Defensive Player of the Year. Sukad usab niadtung 1991 hangtud 2009, nakadula kini sa NBA ilawom sa mga kuponan sa Denver Nuggets, Atlanta Hawks, Philadelphia 76ers, New Jersey Nets, New York Knicks ug Houston Rockets.
Nasayran nga samtang nagdula sa NBA, kamulo usab niining gitabangan ang mga lumolupyo sa Democratic Republic of the Congo pinaagi sa pagtukod og foundation niadtung 1997, lakip sa gipatukod niini ang mga eskwelahan ingon man mga balay-tambalanan pinaagi sa mga charities. Rason nga siya usab ang nahimong pinaka-unang Global Ambassador sa NBA.
