BUTUAN CITY – Gipa-ilalom sa makuting laboratory test sa National Food Authority kon NFA-Surigao del Norte ang mga samples sa 400 ka sakong bugas nga nakumpiska gikan sa tindahan sa gisikop nga negosyanteng Intsik aron masuta kung dili ba kini plastic o kaha fake rice.
Kini human naghatud og samples niini ang mga personahe sa National Bureau of Investigation kon NBI sa maong lalawigan pagpanguna ni Peter Larong.
Mahinumdumang gi-raid sa NBI-Caraga pagpanguna ni regional director Mario Minor ang Smith Rice Trade Store sa susek nga si Andy Smith Gambo Yao og naila usab nga si Zhang Maoying, 28-anyos, ulitawo nga nahimutang sa Sarvida St., Brgy. Taft sa Surigao City.
Kini base na sa reklamo sa negosyanteng si Michael Galo tungod sa pagkopya niini sa trademark sa iyang sakong gipustan sa gibaligya niyang bugas.
Base sa gihimong staining method, physical analysis og moisture content tests, sa laboratory personnel pagpanguna nila Provincial Standard Quality Assurance Officer (PSQAO) Judeline Cupay og Joemark Monteros, nadeklarang dili plastic kon fake rice ang mga nakumpiskang sinakong bugas.
Tungod niini, wala matud pa’y angayang kabalak-an mga nakapalit sa maong bugas tungod kay luwas ang ilang pagkunsumo niini.
Una nang gibutyag ni NBI-Caraga regional director Mario Minor, sa eksklusibong pakighinabi sa Bombo Radyo Butuan, nga kasong paglapas sa Section 165 og 168 sa Republic Act 8293 kon mas nailang Intellectual Property Code of the Philippines partikular ang entrenchment of trademark ang gipasaka nilang kaso batuk sa suspek.
