BUTUAN CITY – Ipa-ilawom pa sa laboratory test ang nakumpiskang gituohang Lapnisan kon Agarwood wedges gikan sa 5 ka mga Vietnamese nga nasikop sa managlahing higayon, kagahapong adlawa ning dakbayan sa Butuan.
Sumala ni Butuan City Police Office kon BCPO P/Dir. Col Alberto Magno, ipadala pa nila sa laboratory ang sample sa maong kahoy aron hingpit nga masayran ang species niini nga maoy gamitong basehan sa isang-at nga kaso batok sa mga responsable.
Kini samtang padayon pang gi-assess ang katibuk-ang kantidad sa maong kahoy kansa mas mahal matod pa kung ibaligya ngadto sa gawas sa nasud.
Mahinumdumang nakuha gikan nila Nguyen Thi Chung, 40-anyos, babae, residente sa Hanoi; Diep Thi Bich, 45-anyos, babaye, residente sa Hoa Binh og Vu Van Trang, 33-anyos, lalaki, residente sa Nam Dinh parehong sakop sa Vietnam ang halos P1.8-milyones pesos nga salaping cash.
Samtang lain pang duha ka mga Vietnamese ang na-hold sa Bancasi Airport pasado alas-singko kagahapon sa buntag human narekober gikan sa ilang posisyon ang susamang mga kahoy nga gisulod sa 17 ka mga bags.
Samtang sa eksklusibong pakighinabi ning sibyahan gikabutyag ni Bureau of Immigration Alien Controler officer Harold Pacasum, nga padayon pang giberipika sa ilang buhatan ang pasaporte sa mga langyaw aron masayran kung asa nga terminal ang nahimong entry point sa mga niini dihang nisulod sa nasud.
Nakuha usab gikan sa posisyon nila To Quoc Vo, 35-anyos og To Tien Phat, 21-anyos, ang red corals nga mitimbang og usa ka kilo og tunga og ang 4-milyons pesos nga salaping cash.
Alayon niini gikatakdang pasakaan pinaagi sa regular filing ug kasong paglapas sa RA 9147 o wildlife resources conservation and protect act of 2001 ug Section 68 PD 705 o Revised Forestry Code of the Philippines ang mga Vietnamese National kansa nahatagan na usab ug kaugalingong abugado ang mga nadakpan.
