BUTUAN CITY – Patay ang usa ka High Value Target nga kanhi myembro sa Philippine Army samtang laing usa ka lalaki usab ang nagpabiling at large human misukil dihang gi-serve ang search warrant sa kwerpo sa Trento Municipal Police Station ning mi-aging alas-6 sa buntag sa may Purok 3 Brgy. San Ignacio, Trento, Agusan Del Sur.
Sumala ni P/Insp. Niel Ben Rufon- Hepe sa Trento Municipal Polie Station sa pakighinabi ning sibyahan, samtang nag-serve sila ug search warrant sa panimalay ni Daniel Janing, 50-anyos, dunay live-in partner ug residente sa nasangpit nga lugar, wala na nila kini na-abtan hinungdan nga gidalikyatan kini sa raiding team sa ikaduhang panimalay niini sa Purok 5 sa samang lugar.
Na-apsan usab nila ang usa ka High Value Target nga si Glenn Labrador, kanhi myembro sa Phil Army nga nag-AWOL kinsa unang nagpaboto rason nga gibaslan kini ug na-igo sa aping hinungdan sa hinanaling kamatayon.
Narekober sa kinatibuk-ang operasyon ang 5 ka mga sachets sa gidudahang shabu nga dunay gibug-atong 10 ka gramo ug 2 ka kalibre .45 nga pistola.
Sa kasamtangan, nagpabilin pang at -large ang nasangpit nga suspetsado ug padayon pang gipapanubayan sa kapulisan.
Hisayran nga gikonsiderang High Value Target sa nasyunal nga lebel ang kanhi sundalo ug mao’y pinaka-unang casualty sa gihimong operasyon sa lugar sa subling pagkasa sa Oplan Double Barrel reloaded. (Kriz Maravilla)
