BUTUAN CITY – Gihatagan og heroes’ welcome kaganinang buntag sa Police Regional Office kon PRO- 13 ang 133 ka mga police officers human gi-assign sa Bangsamoro Autonomous Region in Muslim Mindanao (BARMM) kondiin nagsilbi silang mga membro sa Special Electoral Boards atol sa National and Local Elections.
Gidayeg ang maong mga PRO-13 contingents ni PRO-13 director, Police Brigadier General Christopher Abrahano, uban sa Command Group, regional ug personal staff, ug uban pang mga personahe.
Sigon ni spokesperson PMajor Jennifer Ometer, gimanduan na matud pa ni General Abrahano ang mga police provincial directors diin ilawom ang maong mga pulis nga hatagan sila og panahon nga makabakasyon uban sa ilang pamilya ilabina nga kapin duha ka semana matud pa ang ilang assignment sa maong rehiyon. Kini bisan pa man nga wala maka-agbat og dili maayong hitabo ang nasangpit nga mga pulis atol sa ilang assignment.
Madumdumang nahatagan usab og heroes’ welcome ang unang batch sa 462 ka mga police personnel sa ilang pagpa-uli ning rehiyon niadtong Mayo 16. Sa kinatibuk-an, luwas nang naka-uli ang 595 ka mga police personnel human gi-deploy alang sa ilang election sa BARMM.
