BUTUAN CITY- Nagpahigayon og rally ang mga myembro sa Duterte Panagutin sa Europe ug uban pang grupo kansa nanawagan sa padayon nga pagkapriso ni kanhing Pangulong Rodrigo Duterte ug sa uban pang kauban niini nga giingong responsable sa daghang pagpatay atol sa madugoong drug war.
Gipangunahan sa grupo ang lihok-protesta sa gawas sa International Criminal Court, dala ang mga tarpaulin nga nagpakita sa ilang mga panawagan. Lakip niini ang pagpatubag kang FPRRD, pagbarug alang sa hustisya sa mga biktima sa drug war, dali nga hustisya para sa mga pamilya sa biktima, ug uban pang susamang panawagan.
Nagpahigayon usab sila og mubo nga programa diin gibutyag nga dili angay balewalaon ang tawhanong katungod sa matag sibilyan.
Gipahigayon usab sa mga grupo ang mubo nga programa duol sa ICC headquarters aron ipakita ang suporta sa mga biktima sa giingong extrajudicial killings nga nahitabo sa miaging administrasyon.
Pipila sa mga pamilya sa biktima miuna na og biyahe aron personal nga motambong sa pagdungog sa kanhing pangulo.
