BUTUAN CITY – Subling gibirahan ni Senador Rodante Marcoleta si Senador Pangilo ‘Ping’ Lacson nga gitawag pa niyang manghuhula kon mananagna dihang iyang gi-isa ang isyu sa West Philippine Sea atol sa ilang regular session kagahapon.
Kini human nga gikabig matud pa ni Lacson ang isyu sa Kalayaan Island Group kon KIG nga gustong ipasurender ni Marcoleta sa China ngadto sa gipangita niyang aksyon sa Senate Blue Ribbon Committee kalabot sa resulta sa imbestigasyon niini sa anumalusong mga flood control projects.
Nasayrang gi-imbitar pa ni Marcoleta ang ka-ubanang senador sa himuong pagdungog sa Senate Committee on Foreign Relations pagpanguna ni Senador Erwin Tulfo ugmang adlawa, Huwebes, Marso 12, aron mas mapalapdan ang kahibalo sa tanan kalabot sa isyu sa West Philippine Sea.
Apan dihang gikuhaan sa iyang panig si Tuflo, gipadayag niini nga mibalibad na pagtambong ang National Mapping and Resource Information Authority kon NAMRIA tungod sa isyu sa nasudnong siguridad kondiin dinhi na misulod si Lacson nga mikumpirma og kalihukan si Marcoleta taliwa nga dili pa kini kumpirmadong mahitabo.
Dinhi na gibulabog ni Marcoleta nga mismong si Senador Tulfo pa angnagpahinumdom kaniya sa eskedyol sa pagdungog rason nga natingala nalang siya nga nabali na ang hangin ug gipasangil na ni Tulfo kung nganong gihimong rason ang national security aron dili kini ihinayon.
Dinhi na gipangutana ni Marcoleta nga posibleng paagi na usab kini aron itu-is ang isyu nga angayang resolbahon.
Dihang giklaro ni Marcoleta kung dili ba makonsiderang nasudnong interest ang isyu sa West Philippine Sea, gitubag siya ni Lacson nga dili siya interesado sa iyang ipang-istorya tungod kay sigurado matud pang isulti na usab ni Marcoleta nga duna’y katungod ang China sa West Philippine Sea.
Dinhi na gipadayag usab ni Marcoleta nga sa iyang nasayran, usa ka maayong imbestigador si Lacson apan karon, usa na usab ka maayong mananagna kon manghuhula rason nga daling gisuspende ni Senate President Tito Sotto ang ilang sesyon.
