BUTUAN CITY – Nangayo og dispensa sa publiko ang kadumalahan sa Davao Metro Shuttle ilabina sa mga biktima sa pagkahulog sa usa sa ilang bus unit didto sa Brgy. De Oro ning siyudad sa Butuan kagahapon.
Sigon ni Gretchen Ramitan, Human Resource kon HR and Admin manager sa maong bus company, sukad sa maong hitabo, gitutukan na sa ilang first response team ang dapit nga nahitabuan apil na ang mga ospital nga gidad-an sa mga na-angol nga pasahero
Gipasalamatan sa maong kompanya nga wala’y nagrabihan sa maong hitabo apan bisan pa man, gitutukan nila ang mga na-angol diha sa pagpa-ospital hangtud sa paggawas na sa uban og padayon matud pa nilang atimanon ang mga duna pa’y follow-up check-up.
Giklaro usab niini nga nasulod pa sa speed limit ang gikusgon sa pagpadagan sa driver nga si Merlou Cutara sa iyang unit, base na usab sa ilang pagsusi sa gikabit niining GPS device.
Gidugang pa niini nga duna matud pa’y gilikayang sakyanan ang driver nga kalit lang misingit sa gisubay niining kalsada resulta sa maong hitabo.
