BUTUAN CITY – Upat na ang patay sa pagkuso-kuso sa hurricane Melissa ang Jamaica, nga gi-ila nga labing kusog nga bagyo sa tibuok kalibutan karong tuiga.
Gawas pa kini sa upat usab nga namatay sa Haiti ug Dominican Republic tungod sa epekto sa maong bagyo. Nagpahimangno ang US-based National Hurricane Center sa peligro nga dala sa bagyo, lakip na ang kusog nga hangin, pagbaha, ug storm surge nga gilauman nga masinati sa Jamaica karong gabii hangtod Martes sa buntag.
Posible usab nga moabot sa 40-pulgadas ang ulan sa pipila ka lugar sa Jamaica sulod sa upat ka adlaw. Ang Hurricane Melissa usa ka Category 5 storm, mao ang pinakakusog nga klasipikasyon sa bagyo, nga adunay hangin nga moabot og 145 kilometros matag-oras ug buylo nga mu-abot sa 185 kilometros matag-oras.
Nagpadayon kini sa pagkusog ug gilauman nga moigo sa Caribbean Island karong adlawa.
Nagpahimangno ang mga eksperto nga ang hinay nga lihok sa bagyo magpasabot og dugay nga pag-ulan, nga makapadugang sa peligro sa makamatay nga pagbaha ug landslide sa pipila ka lugar.
