BUTUAN CITY – Gikalipay ni outgoing Bislig City, Surigao del Sur Mayor og incoming Vice Governor Librado Navarro ang pagpagawas na og kamanduan ni Pangulong Rodrigo Duterte alang sa pagpasira na sa tanang buhatan sa Kabus Padatoon kon KAPA Community Ministry International og uban pang mga investment scams.
Sa eksklusibong pakighinabi sa Bombo Radyo Butuan, gipadayag sa opisyal nga dili unta mu-abot sa level ni Pangulong Duterte ang problema sa KAPA kung sa sinugdanan pa lang dihang mitumaw ang isyu batuk niini, gi-aksyunan na kini sa mga local government officials og sa mga tag-as nga opisyal sa mga regional government agencies.
Dako ang kahupay nga gibati sa kasamtangang mayor nga dihang mitumaw kini nga problema sa ilang siyudad, iya gilayon kining na-aksyunan pabor sa katawhan og sa kagamhanan.
Nasubo siya nga tungod sa pagpakabuta-bungol sa mga local og regional officials, duna na’y mga negatibong komento ang katawhang membro sa KAPA batuk sa presidente tungod sa gipagawas niining closure order.
