BUTUAN CITY – Magtagbo pa ang mga negosyante og vape sa tibuok Pilipinas aron hisgutan ang ilang buhaton karong gimando na ni Pangulong Rodrigo Duterte nga sikupon ang mga tawong migamit og electronic cigarettes kon vapesa diha sa mga pampublikong lugar.
Sigon sa Butuanon vape distributor Vincent Taboranza, gikakurat nila ang maong kamanduan tungod kay hilom lamang matud pa ang ilang sektor sa pagpadagan sa maong negosyo dihang migawas ang maong kamanduan. Iyang giklaro nga ang gitumbok sa pangulo nga babayeng namatay tungod sa vape, daan na matud pang duna’y sakit ug migrabe pa tungod sa paggamit sa maong e-cigarettes.
Gidugang pa ni Taboranza nga kanunay silang nagtamod nga dili papaliton sa ilang mga produkto ang mga minor-de-edad base na usab sa nakalatid sa balaud.
Nagtuo siyang usa sa nakapa-aghat sa pangulo pagpagawas sa maong kamanduan mao ang mga menor-de-edad nga nakitang migamit niini diha sa pampublikong mga lugar.
