BUTUAN CITY – Aprubado na sa ikatulo ug katapusang pagbasa sa hawanan sa Sanguniang Panlalawigan sa Agusan Del Norte ang ordinansang nag-obliga sa mga telecommunication companies kon telcos nga mag-operate sa probinsiya nga mohatag ug buhis isip local franchise tax.
Kini human na-aprubahan ang provincial ordinance number 0-318-2018 diin nagkantar nga ang katunga sa tibook tuig nga kita sa usa ka telco, kuhaan ug uno porsiyentong buhis.
Sa ekslusibong pakighinabi ning sibyahan sa nangamahan sa maong ordinansa nga si provincial board member Sal Cuasito, giklaro niining maghatag og dugang kita sa probinsiya ang maong ordinansa.
Gipasabot pa sa opisyal nga sa pagkuha pa lang ug prangkisa sa maong kompanya ngadto sa nasudnong kagamhanan, duna kini bayaran nga buhis isip franchise tax gawas nga magbuhis usab kini sa Local Government Unit kon LGU.
Apan sa taas nga panahon, wala matud pa kini napahimuslan sa lokal nga kagamhanan tungod sa kakulang sa napapasar nga ordinansa og gani sa tibook nasud, ikatulo palang ang Agusan Del Norte sa probinsiya nga nagduso sa samang ordinansa, sunod sa Davao ug Pangasinan.
Sumala pa ni Cuasito, epektibo gilayon kini ugaling mapirmahan apan tungod kay hinapos naman sa tuig, mahimong epektibo na kini sa tuig 2019.
Samtang gihupay usab sa opisyal ang kabalaka nga basin ug ang mga kunsumidor ra gihapon ang magpas-an sa ipatuman unyang taas singil sa serbisyu sa telecommunication company gumikan kay dili basta-basta nga magpataas sa ilang singil ang telcos sa rasong kontrolado kini sa National Telecommunications Commission on NTC rasong ang pagpapasar sa maong balaodnon, dili maka-apekto sa Agusanong kunsumador.
Giklaro usab sa opisyal nga gipatawag nila ang mga telcos apan usa lang ang mitambong sa pagdungog.
Nasayrang ubos sa maong ordinansa, hatagan ug kagahom ang provincial treasurer nga mo-eksamin sa kita sa tibook tuig sa mga telcos diin lakip ang BIR ning rehiyon, gi-obliga pag-abli sa ilang mga records ugaling modool kanila ang provincial treasurer. (Melody Valledor)
