BUTUAN CITY – Ang mga tawo nga nagkinabuhi nga duna’y Human Immunodeficiency Virus kon HIV, dili gikinahanglan nga pugson nga ibulgar ang ilang health status ngadto sa ilang mga employers, tungod kay ang balaod sa Pilipinas naggarantiya sa pagka-konpidensyal ug proteksyon batok sa diskriminasyon.
Sigon sa Philippine National AIDS Council (PNAC), ang impormasyon may kalabotan sa HIV istriktong confidential ug pwede ra ipadayag kung adunay pagtugot gikan sa indibidwal.
Sigon ni PNAC Executive Director Jojo Feliciano, ubos sa Republic Act 11166 o Philippine HIV and AIDS Policy Act, ang dili otorisadong pagpadayag sa kahimtang sa HIV sa usa ka tawo, silotan sa balaod.
Gidugang ni Feliciano nga ang pribadong indibidwal nga mupadayag sa ingon nga impormasyon nga walay pagtugot mahimong ma-priso sulod sa unom ka bulan hangtod duha ka tuig, samtang ang mas lapad nga pagpakaylap lakip na sa social media adunay silot nga pagkapriso sulod sa duha hangtod lima ka tuig.
