BUTUAN CITY – Gitumbok ni P/ Supt. Christian Rafols, Regional Information Officer sa Police Regional Office kon PRO-13 nga ang rebelding New People’s Army kon NPA ang mihunos sa kinabuhi kang SPO3 Riel Morgado sa Santiago, Agusan Del Norte.
Kini human nadakpan ang tulo sa unom ka mga suspetsado og mikumpirmang mga naglihok sa walhong kalihukan.
Sumala pa ni Rafols, boot lang matud pa nga dagiton ang maong pulis aron himoong pagbaylo sa peace talks apan sa dihang nakita sa mga suspetsado nga duna kini armas sa pag-abli sa gate sa iyang panimalay, giunhan na kini sa pagpusil.
Saysay pa ni P/ Supt. Rafols, nakamatikod na nga dunay nagbaras-baras nga single motor sa gawas sa iyang panimalay niadtong higayona hinungdang mikuha kini sa iyang service firearm nga 9mm nga pistol ug mihimu ug pakisusi.
Apan sa pag-abli palang niini sa gate, gipusil kini sa mga suspetsado nga sakay sa duha ka single motor.
Nakahimu pa pagbalos ang biktima apan tungod sa igo na niini sa lawas, nakutloan kini sa iyang kinabuhi. Dali usab nga gikuha sa mga suspetsado ang pistola sa biktima adiser misibat padulong sa Tubay, Agusan Del Norte.
Samtang gidala sa ospital ang biktimang pulis nga nakahiagum ug tulo ka samad pinusilan sa dughan ug isa sa tiil apan gideklara kining dead-on-arrival.
Sa gihimung hot pursuit operation sa hiniusang puwersa sa Santiago Municipal Police Station, Agusan del Norte Provincial Mobile Force, Regional Intelligence Division ug Agusan del Norte Provincial Intelligence Branch, nakumpiska ang duha ka motor nga gigamit sa mga suspetsado samtang nadakpan ang mga drayber niini kauban sa usa ka back rider.
Naila ang mga niini nga sila Renato Caerlang, 34-anyos; Ryan James Caerlang, 18-anyos ug Riedel Cano Cabello, 26-anyos parehong residente sa Purok 8, Barangay Poblacion 1, Santiago, Agusan del Norte og kumpirmadong miyembro sa NPA.
Sa karun gihikay na ang kasong murder nga ipasaka sa mga suspetsado lakip na niini ang padayong gipangeta.
Alayon niini, hilabihan ang kasubo sa han-ay sa kapulisan dayung padayag sa ilang dakong kasuko sa NPA.
Bisan paman niini, gidasig ni Rafols ang kapulisan nga magpadayon sa serbisyo dayong hagit sa mga rebelde nga mosurender dungan og musalig nga dawaton gihapon nila kini tungod kay siya nagtoo nga biktima ra usab sila sa sayup nga gitoohan. (Rolan Janea)
